བོད་ཀྱི་སྐད་ཡིག་དང་འབྲེལ་བའི་སེམས་ཚོར།
ཉིན་འགའི་སྔོན་ལ་ཡུན་རིང་བོར་འབྲེལ་བ་མ་བྱས་བའི་སློབ་གྲོགས་ཤིག་གི་སར་སྐད་འཕྲིན་བརྒྱུད་ནས་རྒྱུས་ལོན་བྱུང་བའི་གནས་ཚུལ་ལྟར་ན། ཁོས་སློབ་ཆེན་མཐར་ཕྱིན་ནས་ད་ལྟའི་བར་དུ་བོད་ཀྱི་གཞི་རིམ་ས་ཆར་བོད་སྐད་ཡིག་གི་དགེ་རྒན་གྱི་བྱ་བ་སྒྲུབ་ཅིང་། ཁོ་རང་གི་ངོས་ནས་དགེ་རྒན་གྱི་ལས་ཀ་འདི་སྒྲུབ་རྒྱུར་སྤྲོ་བ་དང་སེམས་ཤུགས་ཧ་ཅང་ཆེ་མོད། ཡིན་ནའང་ཁོ་ཡོད་སའི་སློབ་གྲྭ་དེ་རུ་ལོ་སྔོན་མ་ནས་བཟུང་སློབ་ཚན་བཀོད་སྒྲིག་བྱེད་སྟངས་གསར་བ་ཞིག་ལག་བསྟར་བྱས་ནས། རྩིས་རིག་དང་རྒྱ་ཡིག་སོགས་སྔ་དྲོར་བཀོད་སྒྲིག་དང་། བོད་སྐད་ཡིག་གི་སློབ་ཁྲིད་ཉིན་རྒྱུན་ལྟར་ཕྱི་དྲོར་བཀོད་སྒྲིག་བྱས་འདུག། ཕྱི་དྲོར་མཚོན་ན་དགེ་སློབ་སུ་ཡིན་རུང་སྔ་དྲོ་བཞིན་རིག་པ་གསལ་བོ་མིན་པས་སློབ་ཁྲིད་ལ་རྩེ་གཅིག་དུ་ཞུགས་མི་ཐུབ་པའི་དཀའ་ངལ་འདུག་ལ། ངས་བསམ་ན་གནས་སྟངས་འདི་ང་ཚོའི་སློབ་གྲྭ་གཅིག་པུ་མིན་པར་ད་དུང་ས་ཆ་གཞན་ཁ་ཤས་ན་ཡང་ཡོད་ངེས་ཡིན་ཅེས་བཤད་བྱུང་།
ངས་འདི་ལྟར་ཁོ་དང་མཉམ་དུ་ཁ་བརྡ་བྱས་པའི་རྗེས་ལ་དོན་བྱ་འདིའི་དམིགས་ཡུལ་དང་རྒྱུ་རྐྱེན་སོགས་ལ་བསམ་བློ་མི་གཏོང་ཀ་མེད་བྱུང་། ད་ལྟ་བོད་མདོ་དབུས་ཁམས་གསུམ་ལ་ཚུལ་དང་མི་མཐུན་པའི་སྐད་གཉིས་སློབ་གསོ་ལག་བསྟར་བྱས་ནས་བོད་སྐད་ཡིག་སྦྱང་རྒྱུུའི་གོ་སྐབས་དེ་སློབ་ཚན་གཞན་དག་ལས་ཧ་ཅང་ཉག་ཕྲ་བར་གྱུར་ཡོད། གནས་བབས་ཉག་ཕྲ་བ་དེའི་སྟེང་ལ་ད་དུང་འདི་ལྟ་བུའི་བྱེད་ཐབས་འདྲ་མིན་སྤྱོད་བཞིན་པ་འདི་ནི་ཁྲིམས་འགལ་ཀྱི་བྱ་སྤྱོད་ཞིག་སྟེ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་དོན་ཚན་བཞི་བའི་ནང་དུ་རིགས་སོ་སོའི་མི་རིགས་ལ་རང་གི་སྐད་ཡིག་བཀོལ་སྤྱོད་བྱེད་པའི་ཐོབ་ཐང་ཡོད་ཅེས་གཏན་འབེབས་བྱས་ཡོད་པའི་ནང་དོན་ལ་རྒྱབ་འགལ་བྱས་ཡོད་པ་མིན་ནམ། འདི་ལ་བོད་པ་སུས་ཀྱང་དོ་སྣང་མ་བྱས་ན་རྡོ་གནམ་འཕང་གི་དཔེ་རུ་གྱུར་ནས་བོད་སྐད་ཡིག་འདི་རང་གི་ས་ཐོག་ནས་རང་མི་རིགས་ཀྱིས་མ་སྦྱང་བའི་མཇུག་འབྲས་ལ་བརྟེན་ནས་ཡ་ང་བའི་ཆག་སྒོ་ཆེན་པོ་ཞིག་འབྱུང་ངེས་བར་སེམས། དེ་བས་ང་ཚོ་བོད་ཀྱི་ཁ་དཔེར་ཡང་བུ་རང་ཉིད་དཔའ་མཛངས་མ་ལྡན་ན། མདའ་ལས་མ་ཤིང་ཆག་སྐམ་པོ་ཡིན་ཟེར་བ་ལྟར་དུ་ང་ཚོ་དཀའ་ངལ་ཞིག་ལ་འཕྲད་དུས་སྲིད་གཞུང་ཁོ་ན་ལ་མི་བརྟེན་པར་མི་སོ་སོའི་རང་སྟེང་ནས་ཅི་ཞིག་སྒྲུབ་ཐུབ་པར་འབད་རྒྱུ་དེ་ཧ་ཅང་གི་གལ་ཆེན་ཡིན། དེ་བས་གོང་ནས་དགེ་རྒན་འདིའི་བཤད་པའི་གནད་དོན་འདི་ལྟ་བུ་ཞིག་ལ་དམིགས་ནས་དགེ་རྒན་དག་གིས་ཀྱང་སློབ་གྲྭའི་ནང་གཏམ་གླེང་དང་རྩོམ་ཡིག་འགྲན་བསྡུར་མང་ཙམ་སྤེལ་རྒྱུ་དང་། ཁྱིམ་བདག་དག་གིས་ཀྱང་མཉམ་དུ་གྲོས་བསྡུར་ཡག་པོ་བྱས་ནས་འཐུས་ཚབ་མི་སྣ་བདམས་ཏེ་ཁྱིམ་བདག་ཚོགས་འདུའི་སྟེང་སློབ་གྲྭའི་མགོ་ཁྲིད་སོགས་ལ་བསམ་ཚུལ་བཤད་རྒྱུ་སོགས། མདོར་ན་བོད་སྐད་ཡིག་འདི་རང་ཉིད་མུ་མཐུད་དུ་གསོན་ཐབས་ཀྱི་སྲོག་ཤིང་ལྟ་བུར་བརྩིས་ནས་མི་རེ་རེས་སོ་སོའི་ནུས་པ་དེ་བེད་སྤྱོད་ལེགས་པོར་བྱས་ན་ང་ཚོ་ད་ལྟ་འཕྲད་བཞིན་པའི་དཀའ་ངལ་དག་ལས་རྣམ་པར་རྒྱལ་ཐུབ་པར་འདོད།